نَزانييم خاين

نَزانييم أَتو بي وَفاني

كَردم بسيير أَتي

ﭼَـني ندلْت أَما إيتَر كَري

دلْييكي أَلات قادَ برﮊاني ﭼَـمي

ﭼـقَ واتشا بَنَم دييرت بكَني

كَوش نَديم قسَشا كادييرت نَكني

نَكوش نَـﭼم نَدلْ زانيش بكارت رويي

خووشييت ﭼَـني خييني هولاروبي

دلي زندارم زالم بـﭼييش دَرمان كَري

دَردم قيلا ﭼارم نيا ﭼييش كَري

مَكازي بَنَم خاين بي زواني

بيل بَرشايت ﭼوزاني

بكويي خاين نَدلْم خَنجَري

كوناي نَوا زندارش كَري

مَكازي أَكا ماري ﭼيري كَهي

شييرينييت كوورش كَردَبي ﭼـمو دلْي

نَزانييم هلياندَبيم سَرَم بَنَم نَبي

سَرخوشبيم عَرَقم بي عشقي أتي

دَرمان هَندا أَلا دلي بيلَ كو بي دَلْي

بَس مَردَ دَرمانما أوكي نَمري

شاعِري شَبَكَي

عَباس آغَ